Жамбыл облысындағы қайғылы оқиға құрбандарының бірі – әскери прокурор Арман Қапезов. Белгілі болғандай, қадағалаушы орғанның қызметкері өзінің туған күні қарсаңында қаза болды.
Бас көлік прокуратурасының баспасөз хатшысы Абырой Халықұлы Жамбыл облысындағы жарылыс кезінде әскери прокурордың қалай көз жұмғанын баяндады.
«Таңертең Оңтүстік аймақтың әскери прокуроры Арман Қуанышұлы Қапезовтың қаза болғаны туралы қаралы хабар жетті. Ол нағыз офицер, қамқор әке, сенімді дос, ортасына сыйлы әріптес болды», – деп жазды Халықұлы әлеуметтік желідегі парақшасында.
Оның айтуынша, Арман Қапезов әскери бөлімнен өрт шыққанын естіген бойда оқиға орнына барған. Адам өмірін арашалаймын деп, өзі ажал құшты.
«Осы әрекетімен нағыз прокурор, әскери антқа адал офицер және Отан алдындағы борышын орындаған азаматтың үлгісін көрсетті. Оны танитын жақын әріптестері ісіне адал, Отанын шексіз сүйген лайықты офицер болды дейді. Азаматтық борышын атқару жолында өз өмірін қиюға дайын осындай әріптестеріміздің арасында қызметімізді ары қарай жалғастыра береміз. Басқа жол жоқ», – дейді Халықұлы.
Прокуратураның баспасөз хатшысы Жамбыл облысындағы төтенше жағдай кезінде қаза болған барлық офицердің отбасына көңіл айтты.
«Бүгін полковник Қапезовті туған күнімен құттықтауға тиіс еді…», – деп жазды Халықұлы.
Айта кетері, осы уақытқа дейін Жамбыл облысындағы әскери қоймада болған жарылыстардан 9 адамның қайтыс болғаны анықталған.
