Логистика геосаясаты – бұл жаһандық және өңірлік күштердің көлік бағыттары арқылы ықпал ету тетіктерін зерттейтін жаңа ғылыми ұғымдардың біріне жатады. Қазіргі таңда көлік дәліздері тек экономикалық емес, сонымен қатар геосаяси маңызды құралға айналып отыр. Орталық Азия елдері үшін тиімді логистикалық жүйелер құру – аймақтың бәсекеге қабілеттілік әлеуетін арттыру және қалыптасып отырған геофсаяси тұрақсыздық жағдайындағы аймақ қауіпсіздігін қамтамасыз етудің негізгі жолы болып отыр.
Осы тақырып аясында 2025 жылғы 4 сәуірде әл-Фараби атындағы Қазақ Ұлттық Университетінің халықаралық қатынастар факультетінде ҚР Ғылым және жоғары білім министрілігінің гранттық қаржыландыруымен АР19679313 «Баламалы көлік дәліздерін қалыптастыру жағдайында Қазақстанның транзиттік-көліктік әлеуетінің бәсекеге қабілеттілігі» атты жоба аясында «Логистика геосаясаты: Әлемдік жүйедегі Орталық Азияның көлік дәліздері» атты халықаралық ғылыми конференция өткізілді.
Конференцияда өңірлік көлік-логистикалық әлеует, баламалы дәліздер және Қазақстанның транзиттік мүмкіндіктері жан-жақты талқыланды. Сонымен қатар, бұл жиын 3-4 сәуірде Самарқандта өткен Еуроодақ – Орталық Азия саммитінің күн тәртібімен үйлесе отырып, өңірлік байланыстылықты арттыру мәселесіне ғылыми-сараптамалық тұрғыдан жауап берді.
Аталған шараға Түркия мемлекетінен, Бейкоз университетінің проректоры, профессор Рагип Кутай Караджа, Әзербайжан мемлекетінен STEM аналитикалық зерттеу Орталығының директоры Орхан Йолчуев, Өзбекстан мемлекетінен Әлемдік экономика және дипломатия университеті Перспективті халықаралық зерттеулер институтының аға ғылыми қызметкері Умарова Наргиза Баходировна, Стамбул Университетінің (Түркия) профессоры Омер Кул, Ресей мемлекетінен «Экономика жоғары мектебі» Ұлттық зерттеу университетінің доценті Соколова Татьяна Дмитриевна, Қырғызстан мемлекетінен ҚР СІМ, К.Диқамбаев атындағы Дипломатиялық Академиясының профессоры, т.ғ.д, Құрманов Зайнидин Карпекович қатысты.
Сондай-ақ, Үндістан мемлекетінен NatStrat аға ғылыми қызметкер Радж Кумар Шарма, Иран мемлекетінен Алламе Табатабаи университеті, ЭЫҰ Сақтандыру институты, Мандана Тишехьяр, Грузия мемлекетінен саясаттанушы Гела Васадзе конференцияға онлайн форматта қатысып, өздерінің Азия, Еуропа және басқа аймақтар арасындағы байланыстарды жақсартуға ықпал ететін көлік инфрақұрылымын және баламалы көлік дәліздерін дамытудағы заманауи трендтерге қатысты құнды ақпараттарымен бөлісті. Қазақстан тарапынан конференцияға ҚазҰУ, ҚСЗИ, Қазақстан-Неміс университеті, Экономикалық зерттеулер институты және басқа да ғылыми ұйымдардың өкілдері қатысты. Сарапшылар Орталық Азияның жаһандық көлік жүйесіне интеграциясы, транзиттік әлеуетін арттыру және бірлескен жобалар құру қажеттігін атап өтті.
Конференция қорытындысында өңірлік логистика саласындағы өзекті ұсыныстар мен шешімдер әзірленіп, ғылыми және коммерциялық ынтымақтастықты дамыту жолдары белгіленді.

Әл-Фараби атындағы ҚазҰУ,
халықаралық қатынастар және
әлемдік экономика кафедрасының
қауымдастырылған профессоры
Д.Қ. Жекенов