2024 жылдың 24 қарашасында әл-Фараби атындағы Қазақ ұлттық университетінде өткен «Құқық қорғау қызметі – мен таңдаған мамандық» атты университетаралық жарысқа 6В12301 «Құқық қорғау қызметі» білім беру бағдарламасының 1 курс студенттері қатысты. Бұл жарыс тұрақты даму мақсаттарының 4-мақсаты «Сапалы білім беру» бағытында және университеттің 90-жылдық мерейтойы аясында заң факультетінің «Қылмыстық құқық, қылмыстық іс жүргізу және криминалистика» кафедрасы профессор-оқытушылар құрамының ұйымдастыруымен өткізілді.

Жарыстың басты мақсаты – заңдылық пен құқықтық тәртіпті қамтамасыз етудегі арнайы мемлекеттік органдардың негізгі қызметінде қолданылатын ғылым мен тәжірибенің байланысын нығайту болды.

Жарысқа 6В12301 «Құқық қорғау қызметі» білім беру бағдарламасының 1 курс 117 топ студенттерінен: Темірлан Ғайдарұлы, Арланбек  Амирхан, Динмухамед Даулетпаков,  Меруерт Жұмадулла, Тұраш Әлшериев құралған «Заң қорғаны» тобы қатысып, ІІ орынға ие болды. Бұл – жастардың білім мен дағдыларын шыңдайтын, құқық қорғау қызметі саласына қызығушылық танытатын болашақ мамандар үшін үлкен жетістік.

Топ мүшелері жарыс барысында өздерінің құқықтық білімдері мен кәсіби дағдыларын жоғары деңгейде көрсете білді. Олар құқық қорғау органдарының қызметіндегі ғылыми тұжырымдар мен тәжірибелік мәселелерді тиімді шешуге қабілеттіліктерін танытты. Мұндай жарыстар студенттердің болашақ мамандықтарына деген қызығушылығын арттырып, оларды кәсіби тұрғыда дамытудың маңызды кезеңі болып табылады.

Жарыстың соңында жеңімпаз студенттер арнайы дипломдармен марапатталды. Марапаттау рәсімінде барлық қатысушылар мен жеңімпаздарға шығармашылық шабыт, жаңа жетістіктер мен табысты болашақ тілектерін білдірілді. Студенттерге университет әкімшілігі мен профессор-оқытушылар құрамы алғыс айтып, олардың оқу жолындағы жетістіктеріне сәттілік тіледі.

Жарыс – болашақ құқық қорғаушылар үшін өзін-өзі танытуға, білімдерін тереңдетуге және мамандыққа деген сүйіспеншіліктерін арттыруға зор мүмкіндік. «Құқық қорғау қызметі» білім беру бағдарламасының студенттері бұл жарыста жоғары нәтиже көрсетіп, құқық қорғау қызметі саласындағы өздерінің білімдерін әрі дағдыларын жетілдіргенін дәлелдеді. Алдағы уақытта да осындай шаралар білім сапасын арттырып, студенттердің кәсіби дамуына септігін тигізетіні сөзсіз.

1 курс 117 топ студенті А. Худаиберген, топ эдвайзері Н.С. Темірболат.