Белгілі әзілкеш Тұрсынбек Қабатовтың қызы үшін ҰБТ-ны басқа адам тапсырды. Нұр-Сұлтан қаласы полиция департаменті оқиғаға қатысты тергеу басталғанын хабарлады.
Полиция ақпаратына сәйкес, оқиға 13 маусым күні болған. Ұлттық тестілеу орталығының қызметкерлері ҰБТ-ға жалған құжатпен қатысқан түлектерді анықтады.
«Тергеу кезінде жалған жеке куәлік жасаған 22 жастағы күдікті ұсталды. Қылмыстық кодекстің 385-бабы 1-бөлігі бойынша қылмыстық іс қозғалды», – деді полиция департаментінде.
Бұған дейін белгілі КВН ойыншысының қызы үшін өзге біреу тест тапсырды деген ақпарат тарады. Бұл туралы Facebook-те заңгер Абзал Құспан жазды. Ол бұл «100% сенуге болатын адамдардан алынған ақпарат» екенін жеткізді.
Заңгердің айтуынша, ҰБТ-ны Әдемі Аманғали үшін университеттің 2-курсында грантта оқитын студент тапсырған.
Құспан адамдар Тұрсынбек Қабатов қызы үшін өзге адам тест тапсыруға келгеніне куә болғанын жазды. Ал әзілкештің өзі бұл туралы әлі ешқандай пікір білдірмеді.
