Алматыдағы 12-қалалық емхананың эпидемиологы Данара Укиева қандай жағдайда вакцина салдыруға болмайтынын хабарлады.
Вакцина алмай тұрып алдымен ағзада антиденелердің болуына ИФТ-тест тапсыруыңыз керек. Егер вакцинаның бірінші дозасын алған науқас ауырып қалса, екіншісін салдыру үшін алты ай күту қажет.
«Егер антиденелер саны белгілі бір титр мөлшерінен асып кетсе, онда вакцина алуға болмайды. Ал антиденелер саны аз болса вакцина қажет, әйтпесе ауырып қалуыңыз мүмкін. Әр ағзаның дербес және антиденелердің жойылу жылдамдығы әр түрлі екенін түсіну керек», – деді Д. Укиева.
Данара Укиеваның айтуынша, вакцинаны 18 жасқа дейінгі адамдар, жүкті әйелдер, емізетін әйелдер, сондай-ақ аллергиялық реакциялар мен созылмалы аурулары бар адамдардан басқалар алуға тиіс.
Еске салсақ, Алматыда қала тұрғындарының вакцина алу науқаны жүріп жатыр. Алматылықтарға ыңғайлы болу үшін қалада 211 екпе пункті жұмыс істейді.
