Елімізде 2 млрд түп ағаш үшін 80 миллиард теңге бөлінеді.
Елімізде 2 млрд түп ағаш үшін 80 миллиард теңге бөлінеді

ҚР экология, геология және табиғи ресурстар вице-министрі Әлия Шалабекова 2025 жылға дейін ел аумағында 2 млрд тал егуге бюджеттен жалпы жиыны 82 млрд теңге бөлінетінін мәлім етті.

«Кешенді жоспар аясында облыстық әкімдіктердің, ерекше қорғалатын табиғи аумақтардың, орман ресурсын пайдаланушылардың, халықаралық донорлардың, табиғат пайдаланушылардың және өзге де бастамашы топтардың күшімен орман егу жоспарланып отыр. Орман егу шарасы және оның көлемі облыстар бойынша пысықталды. Ол үшін ғылыми негіздеме ұсынымдар мен салалық талаптар бекітілді», – деді министр орынбасары.

Вице-министрдің айтуынша, биыл жыл соңына дейін жаңадан 60 млн тал отырғызу жоспарланған.

«Биыл көктемде ел бойынша 21 600 гектар алаңға 81 млн 510 мың түп тал егілді. Күзде 48 млн 200 мың тал егілмек. Егілген талдар саны жыл сайын өсіп отыратын болады. Келесі жылы 244 млн, 2023 жылы 411 млн, 2024 жылы 573 млн және 2025 жылы 643 млн тал егіледі. Көбінесе сексеуіл, қарағай, үйеңкі, шегіршін, қайың және тағы басқа ағаш түрлерін отырғызу жоспарланған», – дейді Шалабекова.

Бұған қоса, ол бұл қаражатқа не алынатынын жеткізді.

«2 млрд ағаштың 1,5 млрд данасы облыстық әкімдіктердің үлесіне келеді. Орман қорын пайдаланушылар мен халықаралық донорларға шамамен 200 млн дана және Орман шаруашылығы комитетіне бағынышты органдарға 300 млн тал егу қажет. Жобаны қаржыландыру республикалық бюджет есебінен де, жергілікті бюджет есебінен де іске асады. 5 жыл ішінде республикалық бюджеттен 22 млрд теңге, жергілікті бюджеттен 60 млрд теңге жұмсалады. Қаражат тиісті техника мен құрылғылар сатып алуға керек. Тапсырманы орындау үшін тракторлар, тал егу машиналары, топырақ қопсытқыш құрылғылар алынады. Елдегі тәлімбақтардың ауданы кеңейтіледі», – деді шенеунік.

Биылдың өзінде жергілікті бюджеттерден 6 млрд теңге, республикалық бюджеттен 5,5 млрд теңге бөлінген, деп қосты вице-министр.

БӨЛІСУ:
  • twitter
  • telegramm
  • facebok
  • vk
Соңғы мақалалар.