Ақтөбеде алты баланың анасы қала әкімі Азамат Бекетке апатты жатақханаға қоныстандырғаны үшін жауапкершілік жүктеуді талап етуде. Гүлжан Сейдильдина әкімдіктен ресми түрде апатты деп танылып, сүруге жататын жатақханадан пәтер кілтін алған, деп жазды Orda.kz.

Әйел ауыр жағдайға тап болып, билікке көмек сұрап жүгінген. Алайда оған шіріген қабырғалары, сынған терезелері, қабырғаларындағы көгеруі және тарақандар өріп жүрген бөлмесі бар ғимараттан орын ұсынылған.

«Жатақхана бар деді де, кілтін ұстатты. Бөлім басшылары Мадияр мен Аружан, Нұржамал деген депутат — бәрі бұл ғимараттың жағдайын білген. Әкімнің өзі де білген, көмекшісімен сөйлестім. Мені сонда комиссия жіберді. Барлығын жауапқа тартуды талап етемін. Бұл үй өмір сүруге қауіпті, бірақ менің таңдауым болған жоқ. Екі айдың жалдау ақысын төлей алмадым. Маған операция жасалды, қиындықтар пайда болды, мені үйден шығарып жіберді. Сол жерге баруға мәжбүр болдым. Мұнда балалар да бар ғой», — деді көпбалалы ана.

Қазір ол осы пәтерде төрт баласымен тұрып жатыр. Үлкен екі баласы — ересек. Отбасы бұл жатақханаға бес күн бұрын көшіп келген.