Алматы облысында жаңадан құрылған Алатау қаласының мұғалімдері қыркүйек айындағы жалақыларынан 25 пайыз үстемақыдан айырылып отырғандарын айтып, наразылық білдіріп отыр. Бұл жағдайға ауылдық статусынан айырылу себеп болған. Мұғалімдер Президент Қасым-Жомарт Тоқаев пен Білім министрлігіне өтініш хат жолдап, бұл мәселені шешіп беруді сұрайды.
Мұғалімдердің айтуынша, ауылдық статус пен оған сәйкес 25 пайыздық үстемақы айтарлықтай маңызды. Өйткені, мұғалімдер әлі күнге дейін ауылдық жерлерде тұрып жатыр, ал Алатау қаласының ресми құрылуы оларға нақты өзгерістер алып келмеген. Жетіген ауылында тұратын мұғалімдер ешқандай инфрақұрылымдық немесе әлеуметтік өзгерістер байқамағандарын айтып отыр.
Алатау қаласының №17 мектебінің мұғалімдері де осы проблеманы көтерді. Олар жаңа қала статусына қарамастан, тұрғылықты жерлерінің ауылдық сипатынан айырылмағанын, сондықтан 5 жылға дейін ауылдық статусын қалдыруды сұрайды. Бұл мәселе олардың әлеуметтік жағдайына тікелей әсер етіп отыр, өйткені 25 пайыздық үстемақыдан айырылу отбасылық бюджетті қиындатып жіберген.
№3 орта мектептің мұғалімдері қала әкімі мұғалімдер күніне арналған мерекелік шарада 25 пайыздық үстемақы сақталады деп уәде бергенін айтып, мұны алдау деп есептейді. Олар бұл мәселенің заңды түрде реттелуін талап етеді. «Әкімнің уәдесіне қарамастан, бухгалтерлер бізге үстемақы ұсталады деп айтып отыр. Бізді алдап отыр, сондықтан қатты наразы болып отырмыз,» – дейді мұғалімдер. Олар биліктен нақты құжаттар мен ресми бұйрықтардың жоқтығына шағымданып, мәселені шешуді сұрайды.
Мектеп мұғалімдерінің бірі, зейнет жасына жақындаған ұстаз, мұндай қаржылық өзгерістерді ертерек ескерту керек болғанын айтады. «Егер бұл өзгерістер тамыз айында алдын ала хабарланса, біз бүгінгі қиын жағдайда болмас едік. Министрліктің оқу процесі кезінде осындай өзгерістерді енгізіп, оны бұзғаны дұрыс емес. Бұл мұғалімдерге үлкен стресс әкелді. Көпшілігіміз несиелерімізді төлей алмай отырмыз,» – деп мұғалім қынжылады.
Мұғалімдер білім саласындағы осы мәселеге жауапты мемлекеттік органдардан ауылдық статус пен 25 пайыздық үстемақыны қайта қарауды сұрап отыр. Олар инфрақұрылымдық дамудың болмауына байланысты қала статусына көшуге дайын емес екенін алға тартады және ауылдық мәртебенің сақталуын талап етеді.
Мұғалімдердің бұл өтініштері білім саласындағы көптеген мәселелерді айқын көрсетеді. Жаңа қалалар құрылып жатқанымен, олардың нақты жағдайы ескерілмей отыр. Мұғалімдердің әлеуметтік жағдайын жақсарту үшін мемлекеттік деңгейде тыңғылықты шешімдер қажет екені анық.
