Жансұлу Дархамбаева әлеуметтік араздықты қоздырды деп екі жылға колонияға сотталған болатын. Әйел жақында жазасын өтеу кезінде босанған.

Белсенді Дархан Абдырахманұлының Facebook желісіндегі парақшасында Жансұлу Дархамбаеваны қолдау мақсатында акция басталды. Ол ҚР ҚК 174-бабы 1-бөлігі («Әлеуметтік, ұлттық, рулық, нәсілдік, сословиелік немесе діни араздықты қоздыру») бойынша екі жылға бас бостандығынан айырылған болатын.

Сот үкімі шығарылған кезде Жансұлу жүктіліктің тоғызыншы айында болған.

Қазіргі таңда жүздеген қазақстандықтар әйел мен оның жаңа туған сәбиі — Ақниетті босатуды талап етіп отыр.

Олар билікті гуманизм танытуға шақырып, әсіресе сәбидің қамауда ұсталуы мен күтім жағдайына алаңдаушылық білдіруде. Осы уақытқа дейін жарияланған жазбаны 500-ден астам адам қолдап үлгерген.