Қостанайда жалақы талап еткен құрылысшылар ұсталып, сот шешімімен әкімшілік қамауға алынды. Олар наразылық акциясын ғимараттың сыртындағы құрылыс люлькасында өткізген.

Жұмысшылар мен компания арасындағы еңбек дауы – наразылықтың басты себебі. Құрылыста жұмыс істеген азаматтар еңбекақыларын ала алмай, наразылық танытқан. Кейін белгілі болғандай, бұл компания — мердігер ұйым екен.

«Орда» басылымының тілшісіне белгілі болғандай, жұмысшыларға рұқсат етілмеген митинг ұйымдастырды деген айып тағылған.

«Сот шешімімен ұйымдастырушы мен қатысушылар кінәлі деп танылып, бір тәулікке әкімшілік қамауға алынды», — деп хабарлады Қостанай облыстық Полиция департаментінің баспасөз қызметі.

Ал «Елена D» құрылыс компаниясы өзіне тағылған айыптарды жоққа шығарып отыр. Олардың айтуынша, наразылық білдіргендер оларға емес, келісімшарт жасалған мердігерге талап қоюы керек.

«Біз мердігерге келісілген соманы толық төледік. Ал жұмысшылар сол мердігермен келісім жасаған, сондықтан ақшаны да соған талап етулері тиіс», — деп түсіндірді компания өкілі.

Журналист мердігердің пікірін білуге тырысқанымен, нәтиже болмады. Себебі оқиғадан кейін мердігер, ереуілге шыққандар және әкімдік өкілдері жұмыс орнын тез арада тастап кеткен.