24 қаңтарда өткен жалпы отырыста Мәжіліс депутаттары денсаулық сақтау саласына қатысты заң жобасын қабылдады, деп хабарлады Zakon.kz.

Түзетулердің бірі – елде вейпке толық тыйым салу.

Заң жобасы президенттің тапсырмасы бойынша әзірленді. Мәжіліс депутаты Гүлдара Нурумова талқылау барысында депутаттардың түзетулер мен нақтылаушы нормаларға енгізілгенін атап өтті.

«Заң жобасы электронды тұтыну жүйелерін (вейп) әкелуге, өндіруге, сатуға және таратуға толық тыйым салу ережелерін қарастырады», – деді Гүлдара Нурумова.

Заң жобасында сондай-ақ медицина қызметкерлеріне әлеуметтік кепілдіктерді күшейтетін нормалар бар:

мектепке дейінгі ұйымдарда орындарды бөлу кезінде медициналық қызметкерлердің балаларына басым құқықтарды қамтамасыз ету;

қызметтiк мiндеттерiн атқару салдарынан қайтыс болған немесе мүгедек деп танылған медицина қызметкерлерінің балалары жоғары оқу орындарына мемлекеттiк бiлiм беру грантына конкурссыз қабылданады;

медициналық мамандық бойынша әскери қызмет өткеру құқығын беру немесе әскери қызметке шақырудан кейінге қалдыру.

Сонымен қатар, медицина қызметкерлерін ынталандыру және олардың тапшылығын азайту мақсатында ауылға жұмысқа келген медицина қызметкерлеріне ең төменгі жалақының 100 мөлшерінде біржолғы ақшалай төлемді қамтамасыз ететін нормативтер қабылданды.