Астана қаласының әкімшілік құқық бұзушылық істер жөніндегі мамандандырылған ауданаралық соты Бауыржан Байбектің әкесі Қыдырғали Байбекке қатысты екі істі қарады
«Сот кабинетінің» мәліметтері бойынша, сот бірінші істі 26 маусымда өндіріске қабылдаған. Сот 11 шілде күні мобильді бейне конференция арқылы өтті.
Астана қалалық соты inbusiness.kz сұрауына бұл іс бойынша сот материалдары қаралғанын, бірақ ресми ақпарат әлі берілмегенін айтқан.
Экс-шенеуніктің әкесі ҚР ӘҚБтК-нің 319-бабы бойынша айыпталған. Бұл бап бойынша тиісті жер құқығынсыз өндірістік, тұрғын үй, шаруашылық, гидротехникалық (су шаруашылығы) немесе тұрмыстық объектілерді заңсыз салғандар жауапқа тартылады.
Бүгін Қыдырғали Байбекке қатысты тағы бір іс қаралды. Ол 29 маусымда өндіріске қабылданған. Біріншісінен айырмашылығы, сот процесі оның жеке қатысуымен өтті.
ӘҚБтК-нің 463-бабының 1-бөлігінде көзделген әкімшілік құқық бұзушылық жасауда Байбек Қыдырғали Мұқаметәмірұлына қатысты әкімшілік құқық бұзушылық туралы іс жүргізуге қабылдансын. Істі қарау үшін әкімшілік құқық бұзушылық туралы іс бойынша іс жүргізудің барлық қатысушыларын сотқа шақыру керек, – делінген сот ұйғарымында.
Бұл бап бойынша кәсіпкерлік немесе өзге де қызметпен айналысуға, сондай-ақ тіркеусіз, рұқсатсыз әрекеттерді (операцияларды) жүзеге асыруға, сол сияқты, егер бұл әрекеттерде қылмыстық жазаланатын іс-әрекет белгілері болмаса, хабарламаны тіркеу, рұқсат беру, жіберу міндетті болған жағдайларда хабарламаны жібермегендер жауапқа тартылады.
Бүгінгі сот шешімі бойынша Бауыржан Байбектің әкесі кінәлі деп танылды. Оған лицензиясыз кәсіпкерлік немесе өзге де қызметпен айналысқаны үшін 51 000 теңге айыппұл салынды.
Arasha.kz
ФОТО: inbusiness.kz
