Ұлттық экономика вице-министрі Арман Қасенов Жеңістің 80 жылдығына орай өтетін Парадқа жұмсалатын қаражат жөніндегі журналистердің сұрақтарына жауап берді.

Журналистер бюджет тапшылығы жағдайында парадқа 2,5 млрд теңге бөлудің қаншалықты орынды екенін сұрады. Қасенов бұл қаражатты бөлуге Ұлттық экономика министрлігі жауапты емес екенін және бұл сұрақты Қорғаныс министрлігіне жолдауды ұсынды.

«1-3 млрд теңге көлеміндегі сома Қазақстан экономикасы үшін айтарлықтай үлкен емес. Жылдық негізгі капиталға инвестициялар 40 млрд долларды, тікелей шетелдік инвестициялар 20 млрд долларды құрайды, бұл шамамен күніне 50 млн доллар. Ал 2-3 млн доллар көлеміндегі шығындар орынды, өйткені олар экспорттың артуына және экономикалық өсімді ынталандыруға ықпал етеді», — деді Қасенов.