Мәжіліс депутаты Ерлан Саиров Қазақстан Республикасының Цифрлық даму, инновация, аэроғарыш өнеркәсібі министрі Бағдат Мусиннен цифровизация бойынша есеп беруді талап етті. Жеке деректердің қауіпсіздігіне күмән келтірген депутат қоғамның талқысына түскен eGov порталын алмастыру және Ресейдің «Сбербанкісімен» осы мәселе бойынша әртүрлі пікір туғызған меморандум туралы сұрады.
«Мемлекеттік қызмет көрсетудің сандық технологияға көшіп, осы саланың шапшаңдығы артып, тиімділігі артқандығы дұрыс, құптарлық қадам.
Сарапшылардың айтуынша, технологиялық дәрежесі жоғары серіктессіз бұл мәселені шешу мүмкін емес екендігін анық.
Дегенмен, қоғам өкілдерін қазақстандықтардың жеке деректерінің сақталуы мен қауіпсіздігі мәселесі өте алаңдатып отыр»,- деді Саиров.
Nur Otan партиясы цифрландыру саласы мемлекет дамуына өзінің нақты үлесін қосуы тиіс екенін айтқан депутат министрге төмендегідей сұрақтар жолдады.
1. Неліктен Қазақстан Республикасының сандық трансформациясы саласындағы жұмысқа «Сбербанк» серіктестігімен меморандумға қол қойылды?
1.1. Неліктен, банк төрағасы қол қойған мұндай құжатқа Қазақстан Республикасының Премьер-Министрі қол қоюы тиіс? Министр немесе «Азаматтарға арналған Үкімет» басшысының деңгейі емес пе?
2. Осы мәселе бойынша Қазақстан Республикасы серіктес болу үшін жаһандық деңгейде лидер ірі компаниялармен келіссөздер жүргізілді ме?
3. Аталған жоба іс-жүзіне асқан кезде, ақпараттық қауіпсіздік нормалары қалай қадағаланады, азаматтардың деректер базасы қай жерде сақталады, бұл базаға шет ел азаматтарының кіру, көру еркіндігі бола ма?
4. Алты жылда мемлекеттік «Ұлттық ақпараттық технология» АҚ 860 млрд астам қаржы бөлінген. Сонымен бірге, барлық мемлекеттік органдар, квази мемлекеттік сектор, ешқандай қызметін көрмеседе, осы компаниямен келісім-шартқа отыруы тиіс деген ақпаратта бар. Осыншама қаржы бөліне отырып неліктен азаматтар сыртқы-ішкі қолданушы ретінде, үзіліссіз, кедергісіз жұмыс істейтін ұлттық сервис алаңын жасай алмадық ?
5. Архив саласын цифрландыруға 1,2 млрд теңге бөлінген екен, осы шаруа неге аяқсыз қалған, қаржы қайда? Азаматтар ең көп қолданатын жердік кадастр саласы неліктен әлі күнге дейін цифрландырылмаған?
Біздің ойымызша, халық, қоғам алдында цифровизация саласындағы жаңдай жөнінде есеп беретін уақыт жетті!»,- деп жазды ол.
