Қарашаның 6-сы жергілікті ақпарат құралдар «Қазақстан АҚШ-тағы жекеменшік SpaceX компаниясының «Falcon 9″ зымыран-тасығышымен Флорида штатында екі ғылыми-технологиялық спутник ұшырмақ» деп жазған.

Министр Атамқұловтың айтуынша, бұдан бұрын спутниктерін ұшырып жүрген ресейлік «Днепр» бағдарламасының жабылуына байланысты Қазақстан өзге елдің зымыран-тасығышын іздеуге мәжбүр болған.

–  Бұл – нарық. Арзан, өзімізге лайықты зымыран іздедік. Кейін «Falcon 9» зымыраны, SpaceX компаниясын таңдадық. Алдын ала дайындығы, сақтандыруы бар, 1 миллион 300 мың – 1 миллион 400 мың долларға түсті. Бұл өте арзан баға деуге болады. Себебі, бірден екі жер серігін ұшырамыз. Бір зымыранмен бір жер серігін ұшыру 10-30 миллион долларға дейін қымбаттап кетуі мүмкін. Ал біз спутникті басқа елдердің жер серіктерімен бірге ұшырайын деп отырмыз, – дейді министр Атамқұлов.

Министр Атамқұлов «Falcon 9» ракетасымен спутник ұшыру ресейлік зымырандардың қызметін пайдаланудан қаншалықты арзан екенін нақты айтпады.

АҚШ-тың жеке меншік SpaceX компаниясының «Falcon 9» зымыраны – бір реттік және көп мәрте пайдалануға жарайтын ауыр класты зымыран түрі. Биыл компания басшысы Илон Маск зымыранның жерге қайта оралу жүйесін сынақтан сәтті өткізіп, коммерциялық ғарыш игеру саласында төңкеріс жасаған.

Халықаралық басылымдар соңғы жылдары «Falcon 9» ресейлік «Союз» зымыранымен бәсекеде озып келе жатқанын жиі жазады.