«Үздік ремикс» номинациясы бойынша Grammy сыйлығын алған Иманбек Зейкенов өзін қолдаған қазақстандықтарға алғыс айтты.
«Достар, мені қолдағандардың бәріне көп рақмет айтқым келеді. Білесіздер ме, өзімді бір сәтке қазақстандықтарды ерте тұруға мәжбүрлейтін Геннадий Головкиндей сезіндім», – деді ол Instagram-дағы sayatnomad парақшасындағы видеода.
Айта кетсек, 15 наурызға қараған түні қазақстандық музыкант Иманбек Зейкенов (Imanbek) америкалық орындаушы SAINt JHN-дің «Roses» әніне жазған ремиксі үшін Grammy алды.
Imanbek-тің нұсқасында «Roses» ремиксі бүкіл әлемде танымал болды. Трек Billboard Hot 100 рейтингінің бестігіне кірді, ал рэпер Карлос Сент-Джон Ақсу тұрғынына ремикс үшін алғысын білдірді.
Қазақстан президенті Қасым-Жомарт Тоқаев «Грэмми» сыйлығына ұсынылған алғашқы қазақстандықтың жеңісі үшін қуанды.
