Билік індет басталғалы бері күшінде болған шектеу шараларын алып жатыр. 

8 қаңтардан бастап Пекин елден шыққысы келетін немесе өзге аймақтарға барғысы келетін азаматтарына қойылған ірі шектеулерден бас тартты. Шетел азаматтарына да қойылған шектеулер алынады. 

Қытайдағы танымал әлеуметтік желілердің бірі Sina Weibo платформаны пайдалану бойынша шамамен 13 мың ереже бұзу туралы хабарламаға «реакция білдіргенін» мәлімдеді. Компания өкілдерінің айтуынша, кейбір қолданушылар «сарапшылар мен ғалымдарға, медицина қызметкерлеріне шүйліккен». Санкцияға шамамен 1200 аккаунт ұшыраған. 

Associated Press жазуынша, індет кезінде Қытай коммунистік партиясы коронавирусқа қатысты қатаң шектеулерін ақтау үшін медициналық қауымдастыққа арқа сүйеген. Қатаң шаралардың басым бөлігі өткен айдың басында жойылған, ізінше індеттің ушыққаны жайлы хабар тарады. 

Еуроодақ, АҚШ, Ұлыбритания, Франция, Канада, Испания, Жапония қазір Қытайда басталған індеттің кезекті толқынына алаңдап отыр. 

Бірқатар ақпарат құралдары Қытайда күн сайын миллиондаған азаматқа коронавирус жұғып жатқанын, елде вирустан өлгендерді қабылдайтын крематорийлерде орын қалмағанын жазған. Пекин бұл ақпаратты ресми түрде растаған жоқ.