Қазақстанның экс-бірінші ханымы Сара Назарбаева тірі, және оны елдің бұрынғы президенті Нұрсұлтан Назарбаев мезгіл-мезгіл барып көріп тұрады, деп бірнеше сенімді дереккөзге сілтеме жасап журналист Әсет Матаев жазды .
«Сара Алпысқызы тірі. Оны Нұрсұлтан Назарбаев анда-санда барып көріп тұрады. Бұл бірнеше сенімді дереккөзден алынған ақпарат», – деп жазды Матаев сәрсенбі күні өзінің Telegram-арнасында.
Матаев KazTAG агенттігіне берген түсініктемесінде, Назарбаев экс-ханымды жиі барып көретінін, ал Алматыдағы «Совминка» ауруханасындағы күзеттің күшеюі — оның денсаулығына қатысты тараған ақпаратпен байланысты екенін айтқан.
Сара Назарбаева туралы
Сара Алпысқызы Назарбаева (Қонақаева) 1941 жылдың 12 ақпанында Қарағанды облысының Қызылжар ауылында дүниеге келген. Балалық шағында анасынан ерте айырылып, 12 жасынан бастап тігін фабрикасында жұмыс істей бастаған.
1962 жылы Нұрсұлтан Назарбаевқа тұрмысқа шыққан. Екеуі Қарағанды металлургия зауытында танысқан: Назарбаев домна пешінде жұмыс істесе, Сара Қонақаева сол пештің электр қосалқы станциясында еңбек еткен. Бұл некеден үш қызы дүниеге келді: Дариға, Динара және Әлия.
Сара Назарбаева Қарағанды металлургия зауыты жанындағы ЖОО-да білім алып, өндірістік жоспарлау мамандығы бойынша жоғары білім алған. Кейін металлургия және көмір өнеркәсібінде қызмет еткен.
Қайырымдылық және қоғамдық қызметі
1990 жылдардан бастап қоғамдық және қайырымдылық қызметпен айналыса бастады. 1992 жылы «Бөбек» республикалық балалар қайырымдылық қорын, ал 1994 жылы «SOS – Қазақстандағы балалар ауылдары» қорын құрды және басқарды. Бұл қорлар жетім және ата-ана қамқорлығынсыз қалған балаларға отбасылық жағдайға жақын ортада өмір сүруге көмектесуді мақсат тұтты.
Сондай-ақ, Сара Назарбаева «Өзін-өзі тану» атты білім беру жобасының авторы. Бұл пән Қазақстан мектептерінде оқытылып, адамгершілік-рухани құндылықтарды жаңғыртуды көздейтін маңызды бағдарлама ретінде бағаланды.
2022 жылдың 17 ақпанында KazTAG агенттігінің хабарынша, кейін «Өзін-өзі тану» пәні қысқартылады және оқушылардың таңдау пәні ретінде қалдырылады жазады.
