Алматы қаласының Түрксіб аудандық соты Air Astana әуе компаниясының әрекетінен заңбұзушылық анықтап, бес жасар Инсаф Асметуллаеваның әкесіне 5 миллион теңге көлемінде моральдық өтемақы төлеуге міндеттеді. Бұл туралы отбасының мүддесін қорғаған адвокат Данилхан Шағатаев хабарлады.

Талап қою әуе компаниясының баланың ауыр жағдайы туралы алдын ала хабардар бола тұра, оны Алматы әуежайында тиісті деңгейде қарсы алуды ұйымдастырмағанына қатысты болды. Сот Алматы халықаралық әуежайынан өтемақы өндіруден бас тартып, жауапкершілікті тек Air Astana-ға жүктеді. Сот шешімі әлі толық рәсімделмеген, бірақ Шағатаевтың айтуынша, шешімнің мәні белгілі — тасымалдаушы жолаушының жағдайының ерекшелігін біле тұра өз міндеттемелерін бұзған.

Инсаф Асметуллаева сәуір айының басында көз жұмды. Адвокаттың айтуынша, бұл жерде әуе компаниясының әрекеті мен баланың өлімі арасында тікелей себеп-салдар байланысы жоқ. Ауру жазылмайтын болған. Алайда Шағатаев атап өткендей, бұл тасымалдаушыны көрсетілген қызметтің сапасы үшін жауапкершіліктен босатпайды.

Алматы әуежайында ми рагының жазылмайтын түріне шалдыққан бес жасар Инсаф Асметуллаевамен байланысты оқиға болды. 12 қаңтарда бала отбасымен бірге Үндістанда емделіп, Делиден Алматыға рейспен ұшып келді. Алайда әуежайға келген кезде ата-анасы тапсырыс берген реанимобиль әуежай аумағына кіргізілмеген. Комада жатқан баланы әуе компания өкілдері кеден бақылау арқылы өткізуге мәжбүрлеген.

Фото: Air Astana