2024 жылдың желтоқсанында Ақтау маңында апатқа ұшыраған Azerbaijan Airlines әуе компаниясының Embraer-190 ұшағының орнына қаза тапқандарды еске алуға арналған мемориал орнатылды.
Мемориал — ұшақ сынықтары жатқан орынды белгілейтін металл қоршау түрінде жасалған. Оның айналасына гүлдер отырғызылып, орындықтар қойылған.
Түпқараған ауданы әкімдігінде бұл мемориалды жергілікті тұрғындар орнатқанын хабарлады.
– Бұл – Маңғыстау облысының бейжай қарамайтын тұрғындарының бастамасы. Олар өз қаражатына қаза тапқандарға құрмет көрсетуді жөн көрді. Мемориалға бюджеттен қаржы бөлінген жоқ, – делінген хабарламада.
Еске сала кетейік, 2024 жылғы 25 желтоқсанда Baku – Grozny бағытындағы Azerbaijan Airlines компаниясының ұшағы Ақтау маңында апатқа ұшырады. 38 адам қаза тапты. Euronews пен Reuters агенттіктерінің мәліметінше, апатқа Ресейдің әуе шабуылына қарсы қорғаныс жүйесі себеп болған.
