Ақмола облысындағы Магдалиновка ауылында төрт адам сібір жарасымен ауырған. Олар қазір жұқпалы аурулар ауруханасында ем қабылдап жатыр.

Жағдайға қатысты пікір білдірген Денсаулық сақтау министрі Ақмарал Әлназарованың айтуынша, карантин жариялауға негіз жоқ.

«Науқастардың жағдайы тұрақты. Тергеу үшін тиісті органдар тартылды. Қажетті эпидемияға қарсы шаралар жүргізілуде. Ошағы залалсыздандырылды. Ал карантин жариялау үшін нақты жағдайлар болуы керек», – деді министр.

Ауруға себеп болуы мүмкін ет өнімдері тәркіленді. Тергеуге Ауыл шаруашылығы министрлігі де қосылды.

Аймақтық «Nayzakokshe» басылымының хабарлауынша, ауруханаға бірінші болып мал сойған жергілікті малшы түскен.

Оннан астам адам күмәнді белгілермен медициналық көмекке жүгінген, алайда ресми түрде төрт жағдай ғана расталды.