Мьянмадағы жойқын жер сілкінісінен 1644 адам қаза тапты, тағы 3408 адам жарақат алды, 139 адам із-түзсіз жоғалған.

Мьянма Мемлекеттік әкімшілік кеңесінің (елдің жоғарғы билік органы) төрағасы, аға генерал Мин Аун Хлайн бүгін таңертең Мандалай қаласына келіп, зардап шеккен аймақты аралады. Ол кеше халықаралық көмек көрсетуге шақырды.

Сенбі, 29 наурыз күні Қытайдан 37 адам Янгон қаласына сейсмодетекторлар, дрондар және гуманитарлық жүкпен келді.

Ресей 120 құтқарушысы мен жабдықтары бар екі ұшақ жіберді.

Үндістан іздестіру-құтқару тобын, медициналық бригаданы және азық-түлік пен төсек-орын жабдықтарын қамтитын гуманитарлық көмекті жөнелтті.

Малайзия 30 наурызда 50 маманнан тұратын көмек тобын жібереді.

БҰҰ құтқару жұмыстарының бірінші кезеңіне 5 миллион доллар бөлді.

АҚШ президенті Дональд Трамп қолдау көрсететінін мәлімдеді.

28 наурыз күндізгі уақытта 7,7 магнитудалы жер сілкінісі болды, оның эпицентрі Мьянманың екінші ірі қаласы Мандалай маңында орналасқан. Негізгі дүмпуден кейін 6,4 магнитудалы афтершоктар тіркелді.

Соңғы мәліметтерге сәйкес, Мьянмадағы бес қалада жер сілкінісінің зардаптары байқалды. Мандалайда бірнеше ғимарат қирады, соның ішінде қаланың ең ірі монастырларының бірі. Ел астанасы Нейпьидода тұрғын үйлер мен халықаралық жолдардағы екі көпір құлады.

Көршілес Таиландта жер сілкінісі салдарынан салынып жатқан 33 қабатты ғимарат құлады. Қазіргі уақытта Таиланд курорттарында 4 мыңнан астам қазақстандық турист бар. «Туристік қамқор» қорының хабарлауынша, шұғыл елге қайту туралы өтініштер түспеген. Туристік аймақтарда жерасты дүмпулері сезілмеді, инфрақұрылымға зақым келмеген.