Өзбекстан елшілігі кем дегенде бес азаматының ұсталғанын растады.

Мысырда шетелдіктерге қатысты тексерулер күшейтілді: Каир қаласында полиция Қазақстан, Өзбекстан және Ресей азаматтарына, соның ішінде студенттерге рейд ұйымдастыруда. Куәгерлердің айтуынша, адамдарды көшеден және үйлерінен күштеп алып кетіп жатыр, ал туыстары олардың қайда екенін апталап біле алмай жүр, деп жазады Telegram-дағы «Осторожно, новости» арнасы.

Студенттердің айтуынша, құқық қорғау органдары университеттер мен мешіттердің маңында кезекшілік атқарып, құжаттарды тексереді. Тіпті визасы мен студенттік куәлігі барлардың өзін ұстап әкетуде. Депортацияланғандардың бірі өзін намазға бара жатқан жолда ұстағанын айтты.

Өзбекстан елшілігінің мәліметінше, 13 мамырға дейін Мысырда кем дегенде бес өзбекстандық ұсталған. Елшілік Мысыр полициясы шетелдік студенттердің елде болу заңдылығын белсенді түрде тексеріп жатқанын растады және әрдайым құжаттарды өзімен бірге алып жүруді ұсынды.