Шерзат Полатты қатыгездікпен өлтіру ісі бойынша айыпталушылардың адвокаттары прокурор Дана Сәрсенбайға қарсылық білдірді.

«Прокурор айыпталушыны шатастыруға тырысуда», – дейді айыпталушылардың қорғаушылары.

Адвокаттар Сәрсенбайдың сотта Шерзат Полатпен алғашқы жанжалға қатысқан Дархан Әскентайды сұрау тәсіліне наразылық білдірді. Сонымен қатар, олар прокурорды тым эмоцияға беріліп отыр деп айыптады.

«Мені ауыстыруға негіз жоқ. Егер мен сотта жағдайды жан-жақты зерттемесем, өз жұмысымды қалай атқарамын? Ал «эмоционалды» дегенге келсек – олар менің күнделікті өмірімде қандай күйде болатынымды қайдан біледі? Эмоцияма баға беруге қандай хақылары бар?», – деді Сәрсенбай өз жауабында.

Қарсылыққа екінші прокурор мен жәбірленуші тараптың адвокаттары да қарсы шықты.

«Айыптау тарапының барлық сұрақтары орынды, прокурор тарапынан артық эмоция байқалмайды», – деді жәбірленуші тараптың адвокаттарының бірі. Ол бұл өтінішті қанағаттандырмауды сұрады.

Сот шешім қабылдау үшін кеңесу бөлмесіне кетті.