Нұрқанат қайғылы оқиға болған күні үйінде ұйықтап жатқан. Оны Шерзаттың анасы оятып, баласының біреумен жанжалдасып жатқанын айтқан. Оқиға орнына, яғни дүкен маңына келгенде, Нұрқанат жиенінің айыпталушылардың бірімен сөзге келіп жатқанын көрген.

«Шерзат одан әкесіне неге дөрекі сөйлегенін сұрады. Жауап ретінде Дархан Әскентай (айыпталушы — ред.) жанжал барысында Шерзаттың анасын балағаттаған. Сол кезде Шерзат оны ұрып жіберді. Ал Қаржаубай болса Дарханға: „Бала-шағамен жанжалдасқаның үшін неге басқаларды шақырып жатырсың?“ деді», — делінген марқұм Ғаепбаевтың куәлігінде.

Нұрқанаттың айтуынша, ол Дарханды сабырға шақыруға тырысқан. Дархан кешірім сұрағандай болғанымен, «арандатуды жалғастырған». Кейінірек сол жерге Дарханның танысы келген, ол өз таныстарына, соның ішінде «Чика» лақапатты жігітке қоңырау шала бастаған.

Дүкеннің маңына адамдар жиналған кезде, әлдебір Чика көліктен түсіп, өзгелерге: «Бастаңдар!» — деп бұйырып, кетіп қалған.

«Сол сәтте бір қыз көліктен пышақтар алып, жігіттерге тарата бастады. Бірнеше адам маған шабуыл жасады. Ол кезде Шерзат жерде жатқан, „Аға, маған бірдеңе тығып алды“ деді. Қасына барсам, пышақталған екен. Көмек көрсетіп үлгермей жатып, тағы сегіз адам жүгіріп келіп, жарақатына қарамастан ұрып-соға бастады. Мені Абзал Шынасыл мен Нұрқияс Ильясов санымнан пышақтап, басымнан металл затпен ұрды», — дейді ол.

Сондай-ақ, ол өзінде мылтық болғанын жоққа шығарған.

Бұл куәліктерді Нұрқанат Ғаепбаев тірі кезінде берген. Ол — қаза тапқан Шерзат Полаттың ағасы. Тергеу деректері бойынша, Ғаепбаев өзін-өзі өлтірген.

Қызығы, тергеу барысында «Чика» есімді адам жайлы тек Шерзаттың анасы мен марқұм Ғаепбаев қана айтқан. Бұл адамның тұлғасы әлі анықталған жоқ.