Әлеуметтік желілердегі ақпаратқа сәйкес, депутат Нұрлан Байғазиев Тараздағы кафелердің бірінде кездесуде болған. Ол телефонын сол жерде тамақтанып отырған отбасының үстеліне жақын жерге қуаттауға қойған. Депутат жиі-жиі келіп, хабарламаларын тексеріп, қоңырауларға жауап беріп отырған. Куәгерлердің айтуынша, бұл әрекет сол үстелде отырған қонақтарға қолайсыздық тудырған.

Баласымен отырған әйел Байғазиевтен телефонын басқа жерге қоюын сұраған, себебі ол телефон құлап, балаға тиіп кетуі мүмкін деп қауіптенген. Осыдан кейін оның күйеуі жағдайға араласып, депутатпен әңгімеге кіріскен. Алайда Байғазиев дәл сол жерде қалдыру керектігін айтып, өз талабынан бас тартпаған. Бұл жанжалды ушықтырып жіберген. Ақырында туындаған жанжал барысында ер адам депутатты ұрып, тепкен.

Дәрігерлер Байғазиевтің бет сүйегінің жабық сынғанын анықтаған. Алайда ол ауруханаға жатудан бас тартқан.

Аталған оқиға бойынша «Бұзақылық» бабы бойынша сотқа дейінгі тергеу басталды. Күдікті анықталып, полицияға жеткізілді.