Қазақстан Республикасы Премьер-Министрінің орынбасары – Сыртқы істер министрі Мұрат Нұртілеудің Беларусь Республикасының Елшісі Павел Утюпинмен кездесуі барысында Қазақстан-Беларусь екіжақты деңгейдегі, сондай-ақ көпжақты ұйымдар шеңберіндегі ынтымақтастықтың өзекті мәселелері талқыланды.

Айта кетсек, бұған дейін Беларусь президенті Александр Лукашенко «Россия» телеарнасына берген сұхбатында бірнеше посткеңестік республикалардың сыртқы саясатын сынап, Қазақстанды ерекше атаған болатын. Лукашенко: «Қазақстанда бірдеңе болған кезде» Астана Қытайға, Үндістанға немесе Пәкістанға емес, Мәскеу мен Минскке бет бұрғанын еске алды», – деп атап өтті. Қазақстанның Сыртқы істер министрлігі бұл сөздерге жауап ретінде Беларусь Елшісі Утюпиншақыртып,  Астана БҰҰ Жарғысына сәйкес теңгерімді және бейбіт сыртқы саясат жүргізіп жатқанын айтты.

Атап айтқанда, Министр Қазақстан БҰҰ Жарғысына және халықаралық құқықтың негізін қалаушы нормаларына сәйкес теңгерімді және бейбітшіл сыртқы саясат жүргізіп жатқанын ерекше атап өтті. Еліміз мемлекеттер арасындағы барлық келіспеушіліктер саяси және дипломатиялық жолдармен шешілуі тиіс екеніне нық сенімді.

Қазіргі геосаяси жағдайда Мемлекет басшысы жүргізіп жатқан еліміздің сыртқы саяси бағыты өзінің тиімділігін көрсетті.

Осыған байланысты Министр Беларусь тарапын қазіргі процестерге қатысты Астананың ұстанымын объективті бағалауға шақырды.