АҚШ мемлекеттік хатшысының Оңтүстік және Орталық Азия істері жөніндегі көмекшісі Дональд Лу «Батыстың міндеті – Қазақстанға ақыл айту емес, қолдау» деді.

«Батыстың міндеті – ақыл айту емес, Қазақстанды қолдау және елдің өзіне қаңтар айында туындаған адам құқығы мәселесін шешуге мүмкіндік беру және мұндай жағдайды болдырмауы үшін қажетті әлеуметтік, саяси және экономикалық реформаларды әрі қарай жүзеге асыру», – деді Д.Лу.

Мұндай пікірін ол «АҚШ пен Каспий өңірі елдері арасындағы дипломатиялық қарым-қатынастардың 30 жылдығы» атты вебинарда айтты.

Вебинарға Қазақстан тарапынан президенттің арнаулы өкілі Ержан Қазыхан қатысты.

Бұған дейін еуропарламент қаңтар оқиғасына қатысты қарар қабылдап, оқиғаға халықаралық ашық тергеу жасауға шақырған.

Еуропарламенттің бұл әрекетіне қатысты президент Тоқаев «қаңтар оқиғасына қатысты мәселені Қазақстан ешкімнің араласуынсыз өзі шешеді» деп мәлімдеген.