АҚШ президенті Дональд Трамп Ресей президенті Владимир Путинмен кездесуге дайын екенін мәлімдеді. Трамп Air Force One бортында журналистерге берген сұхбатында Путинмен телефон арқылы сөйлескенін растады. 

«Мен Путинмен кездесер едім, бірақ бұл үшін дұрыс уақыт керек. Дұрыс уақытта біз кездесеміз», – деді АҚШ басшысы. 

Бұл мәлімдемеге қатысты Ресей президентінің баспасөз қызметі әлі пікір білдірген жоқ. Дегенмен, Ресей Сыртқы істер министрлігі (СІМ) Украина мәселесі бойынша диалогқа дайын екенін жеткізді. 

«Біз диалогқа ашықпыз», – деді Ресей СІМ басшысының орынбасары Михаил Галузин РИА Новости агенттігіне берген сұхбатында. 

Трамп пен Путин арасындағы әңгіме

Бұған дейін Трамп Владимир Путинмен телефон арқылы сөйлескенін хабарлады. Оның айтуынша, бұл әңгіме Украинадағы соғысты тоқтатуға бағытталған келіссөздерді талқылау үшін жүргізілген. Алайда, екі лидер арасындағы сөйлесудің қанша уақытқа созылғаны белгісіз. 

Ресей президентінің баспасөз хатшысы Дмитрий Песков бұл ақпаратқа қатысты «мен не растай алмаймын, не жоққа шығара алмаймын» деп қысқаша жауап берді. 

Зеленский: «Қақтығыс 2025 жылы аяқталуы мүмкін»

Украина президенті Владимир Зеленский жақында берген сұхбатында Ресеймен келіссөздерге дайын екенін мәлімдеді. Ол қақтығыстың 2025 жылы аяқталуы мүмкін екенін айтты. Алайда Киев үшін басты шарт – АҚШ пен Еуропаның сенімді кепілдіктері. 

Трамптың Украинаға қауіпсіздік кепілдігі туралы жоспары

Дональд Трамп New York Post басылымына берген сұхбатында Украинаға қауіпсіздік кепілдіктерін ұсыну жоспарын жариялады. 

Трамптың айтуынша, ол Украина президенті Владимир Зеленскиймен 500 миллион долларлық келісім жасасқысы келеді. Бұл келісім Украинадағы сирек кездесетін минералдар мен газға қол жеткізу мүмкіндігін қарастырады. Оның орнына Вашингтон Киевке кез келген ықтимал бейбіт келісім аясында «қауіпсіздік кепілдіктерін» ұсынуға уәде береді. 

Бұл бастамалар алдағы уақытта әлемдік саясаттағы басты талқылау тақырыптарының бірі болуы мүмкін.

Самал Асқар