Юн Сок Ёль президенттік қызметінен ресми түрде айырылды. Конституциялық сот отырысы 4 сәуір күні таңертең өтті.

Барлық сегіз судья бірауыздан шешім қабылдап, президент Юн Сок Ёльді қызметінен шеттетуге үкім шығарды. Осылайша, Конституциялық сот қаңтар айында импичмент жариялаған парламенттің шешімін қолдады.

«Сот барлық айыптауларды, соның ішінде оның әскери жағдай енгізу үшін заң талаптарын орындамағанын мойындады. Конституцияға сәйкес, президент тек соғыс жағдайында немесе елдегі төтенше жағдай кезінде ғана әскери жағдай жариялай алады», – деп жазды Yonhap агенттігі.

Юн Сок Ёль сот үкімін тыңдауға келмеді. Бұған дейін Оңтүстік Кореяның Конституциялық соты премьер-министр Хан Док Су-ға жарияланған импичментті жоққа шығарған болатын.

Еске сала кетейік, Юн Сок Ёль 2024 жылғы 3 желтоқсанда елде әскери жағдай енгізуге тырысқан. Осыдан кейін Оңтүстік Корея парламенті оны бүлік жасады деп айыптаған.

Саясаткер екі айға жуық қамауда болды, бірақ кейін босатылды.

Президенттік сайлау 60 күн ішінде өтуі тиіс. Мүмкін болатын күн ретінде 3 маусым қарастырылуда.