Ресейдің мемлекеттік ядролық энергетика компаниясы «Росатом» Түркияда салып жатқан 25 миллиард долларлық атом электр станциясындағы 49% үлесін сатуға қатысты келіссөздер жүргізіп жатыр.

Акуйю атом электр станциясына жауапты Росатом еншілес компаниясының директорлар кеңесінің төрағасы Антон Дедусенко Bloomberg агенттігіне берген сұхбатында Ыстамбұлда өткен Атом электр станциялары көрмесі мен саммиті аясында бұл келіссөздердің түрік және шетелдік инвесторлармен жүріп жатқанын айтты.

«Бірінші блок электр өндіруге жақындаған сайын инвесторлар қызығушылық таныта бастады», — деді ол.

Бұған дейін, 2018 жылы үлесті сату әрекеті сәтсіз аяқталған. Сол кезде Cengiz Holding AS, Kolin Insaat Turizm Sanayi ve Ticaret AS және Kalyon Insaat Sanayi ve Ticaret AS сияқты түрік компанияларының консорциумы коммерциялық шарттар бойынша келісімге келе алмай, жобадан бас тартқан болатын.

4,8 гигаваттық бұл нысан Түркиядағы алғашқы атом электр станциясы болады. Қазіргі уақытта бірінші блокта сынақ жұмыстары жүріп жатыр және 2026 жылы электр энергиясын өндіре бастайды деп күтілуде.

«Жыл соңына дейін электр желісіне қуат беру үшін қажетті жүйелер дайын болады деп сенемін», — деді Дедусенко.

Жоба бірнеше рет кешігулер мен қаржыландыру мәселелеріне тап болған. Себебі шетелдік банктер АҚШ санкцияларынан қауіптеніп, жобаны қаржыландыруға құлықсыз болды. Осыған байланысты Түркия мен Ресей құрылысты қаржыландырудың балама жолдарын — мысалы, табиғи газ айырбастау келісімі сияқты нұсқаларды қарастыруға мәжбүр болды.