Бұл тізімге 600-ден астам қазақстандық енген. Қазақстан азаматтарының Ресей тарапында соғысып жатқанын Украина Қорғаныс министрлігі мен Бас барлау басқармасы қадағалайтын «Хочу жить» орталығы жариялады.

Аталған мекемелер мен орталықтың мәліметінше, 2022 жылдан бері соғысқа 661 Қазақстан азаматы қатысқан, олардың кемінде 78-і қаза тапқан. Ақпарат көзі ретінде Ресей армиясы қолбасшылығының анонимді өкілдері көрсетілген.

«Айта кетейік, жалдамалылық – Қазақстан Республикасында қылмыстық жауапкершілікке тартылатын әрекет. Ресей армиясы қатарында аман қалғандар елге оралған жағдайда 12 жылдан 17 жылға дейін бас бостандығынан айырылып, мүлкі тәркіленуі мүмкін», – делінген «Хочу жить» орталығының хабарламасында.

Орталықтың мәлімдеуінше, бұл хабарлама Қазақстан азаматтарына қатысты жарияланған алғашқы ақпарат. Алдағы уақытта Ресей жағында соғысып жүрген шетелдіктер туралы осындай мәліметтер жарияланбақ.