Ұлыбритания премьер-министрі Кир Стармер Франциямен, Украинамен және басқа да елдермен бірлесіп, Ресей-Украина соғысын реттеуге арналған жаңа бейбітшілік жоспарын әзірлеуді жоспарлап отырғанын мәлімдеді.
Стармердің айтуынша, бұл шешім Украина президенті Владимир Зеленский мен АҚШ президенті Дональд Трамптың Ақ үйдегі келіссөздерінен кейін қабылданған.
«Ұлыбритания, Франция және мүмкін тағы бір-екі ел Украинамен бірлесіп, соғыс қимылдарын тоқтату жоспарын жасайды, содан кейін бұл жоспарды АҚШ-пен талқылаймыз», – деді Стармер.
Бұл бастамаға тағы бірнеше мемлекет қосылуы мүмкін. Жоспар дайын болғаннан кейін ол Америка Құрама Штаттарына ұсынылады.
Премьер-министр Кир Стармер Ұлыбритания мен Франция бұл мәселе бойынша көшбасшылық танытып, белсенді жұмыс істейтінін атап өтті. Ол Украина президенті Владимир Зеленскийге сенім артатынын, бірақ Ресей президенті Владимир Путинге сенбейтінін айтып, Украина қауіпсіздігін қамтамасыз ету қажеттігін алға тартты.
Сонымен қатар, Ұлыбритания Украинаға 2,7 миллиард еуро көлемінде 30 жылға несие бөлетінін жариялады. Бұл қаражатты қайтару Ресейдің бұғатталған активтерінен түскен кіріс есебінен жүзеге асырылмақ.
Франция президенті Эммануэль Макрон да Еуроодақ елдері тарапынан Украинаға жүздеген миллиард еуро көлемінде көмектің бөлінуі мүмкін екенін айтты. Бұл шешім 6 наурызда өтетін саммитте қарастырылады.
