Қазақстандық әнші Димаш Құдайберген туған күнінен кейін желідегі парақшасына белгілі мемлекет және қоғам қайраткері Иманғали Тасмағамбетовпен өткен кездесуден ерекше рухани азық алғанын жазды.  

Димаш Instagram парақшасында кездесуден фотосурет жариялады.

«Тегінде адам баласы адам баласынан ақыл, ғылым, ар, мінез деген нәрселермен озады. Одан басқа нәрсемен оздым ғой демектің бәрі де – ақымақтық», – деп Абай атамыз бекер айтпаған. Осы тұста көрнекі қоғам және мемлекет қайраткері, өр мінезі мен іскерлігі, руханиятымыз бен ұлтымызға деген жанашыр қасиеттер бойынан табылған Иманғали ағамызбен әңгімелескен сайын ерекше рухани азық аламын… Өте жақсы кездесу болды. Мен дегенде алып ұшқан жүрегіңізге, тілегі көлдей көңіліңізге көп рахмет аға!», – деп жазды әнші.

24 мамырда Димаш Құдайберген 27 жасқа толды. Оған Қазақстан президенті Қасым-Жомарт Тоқаев құттықтау жеделхатын жолдады. Онда Димаштың ән арқылы ұлттық құндылықтарымызды дəріптеп, қазақтың тілін, қоңыр домбырасын, ізгі дəстүрлерін əлемге танытып жүргені айтылған.

Әншінің туған күніне орай Димаштың қалай әлемдік жұлдызға айналғаны туралы деректі фильм жарық көрді.