Елдің көңілі референдумға дейінгідей емес. Жабырқау… Күткен жаңалықтың, көңілден шықпағаны көрініп тұр. Шарықтап кеткен баға, титықтатқан жұмыссыздық, теңіздің қасында отырып, ауыз суға жарымау, айта берсең проблема шаш етектен. Бұл туралы Мәжіліс депутаты, Ұлттық құрылтай мүшесі Еділ Жаңбыршин әлеуметтік желіде жазды.

Депутат Маңғыстауға жасаған іс сапарында халықтың жағдайы мәз емес екенін мәлімдеді.

«Құрылыс жұмыстарына қаржы жетіспейді, жобалық-сметалық құжаттар түгелге жуық корректировкадан өтуі керек. Оған да қаржы жетіспей жатыр дейді құрылысшылар. Арты не болмақ? Мектептегі сағат қысқартудан босаған мұғалімдер мәселесі тағы бар.
Жанар-жағар май дефициті. Біз мұнай мен газдың үстінде отырған елміз, үш мұнай өңдеу зауытымыз бар. Бұл қалай сонда?!», – деп жазды ол.

Соны мен қатар ол қант тапшылығы неше ай болды әлі реттелген жоқ, реттелетін түрі де көрінбейді, деген ойын білдірді.

«Осыларды жүйелі шешуге бағытталған жобаларда көрінбейді. Бұл біреуді кінәлау емес, халықтың айтып отырған назы мен сыны. Ел қатты қиналып отыр. Жағдай «ескі Қазақстаннан да» жаман болып кетті деп, айтып отырғандар бар. Менің ойым айтады: Ескі жүйеде жұмыс жасап қалған шенеуніктер, жаңа жағдайға бейімделе алмай, жаңаша жұмыс жасай алмай отыр. Ескі «Жигули» қанша әдемілесеңде «Тойота» бола алмайды. Қанша рет айттық, жаңа кадрлар керек деп. Бәрін жасайтын адам, 8 айда ештеңе жасай алмаған Үкімет, енді бірдеңе қатыра қояды дегенге өз басым сенбеймін. Ренжімесін жігіттер», – деп жазды Еділ Жаңбыршин.

Сондай-ақ ол әлі күнге шейін экономиканы «жаулап» алған олигархтар кетпегенін жеткізді.
Сол баяғы «өркеш майды» сору жүріп жатыр.

«Бір схемадан, екінші схемаға ауысып. Әйтпесе күні кеше тым жақсы сатылып тұрған дизель отыны мен бензин неге жоқ? Сол баяғы тарифтер, сол баяғы «откаттар», сол баяғы жемқорлық, сол баяғы әуе билеттерінің қымбатшылығы және т.с.с. Үшіншіден, саботаж. Ескі кадрлар мен экономикаға кіріп алған «паразиттердің» ойы мемлекет басшысының халық алдында беделін түсіріп, тақтан тайдыру. Алдағы уақытта олар өздерінің қуаттары мен ресурстары күйреп, халықтың әл-ауқаты артатынын біледі. Шамалары келгенше қарсыласуда. Қарсылық барлық салада және деңгейде жүріп жатыр!»,- дейді ол.

Депутат биліктің барлық тармағына жаңа, таза адамдарды әкелу қажеттігін айтады.

«Тек мемлекет мүддесін ойлайтын. Ондай азаматтар 19 млн халық ішінен табылады.
Екінші. «Паризиттерді» құрту керек, әйтпесе қоғамда үлкен «эпидемия» болады.
Үшінші. Мұны тез жасау керек. Жаңа жылға дейін. Шыдамныңда шегі бар екенін ұмытпаған жөн!», – деп жазды Жаңбыршин.