Мәжіліс депутаттары заңнамаға тиісті түзетулерді екінші оқылымда қабылдады. Спорт ұйымдары басшыларының ротациясы білім беру жүйесіндегі бірінші басшылардың ротациясына ұқсас болады. Бұл олардың кәсіби әлеуетін неғұрлым тиімді пайдалануды қамтамасыз ету үшін ұсынылып отыр.
Мемлекеттік дене шынықтыру және спорт ұйымдарының жоғары басшыларын қызметке тағайындау және қызметтен босату тәртібі де саланың ерекшеліктерін ескере отырып, заңмен белгіленеді.
Спорттағы дарынды балаларға арналған мамандандырылған мектеп-интернат-колледждерге және мектеп-интернаттарға қабылдаудың үлгілік қағидалары бекітіледі.
Депутаттар сондай-ақ сабақтар мен спорттық жарыстарға қатысудың ең төменгі жасын бекіту жөніндегі нормаларды нақтылады.
Бұл жекелеген спорт түрлерін халықаралық ережелерге сәйкес келтіру үшін қажет. Өйткені халықаралық жарыстар тек жастар мен жасөспірімдер арасында ғана емес, юниорлар арасында да өткізіледі.
