27 қарашада Байқоңыр ғарыш айлағынан «Союз МС-28» кемесі ұшырылған сәтте зымыран стартына қажетті техникалық құрылым зақымданғаны белгілі болды. "Коммерсант" басылымының дерегінше, алаңды жөндеуге алты айдан екі жылға дейін уақыт кетуі мүмкін. Бұл кезеңде Ресей Байқоңырдан зымыран ұшыра алмайды, деп хабарлайды Arasha.kz.
"Роскосмос" апат фактісін растады. Мәлімет бойынша, ұшыру кезінде зымыран тасымалдаушы қозғалғанда жылжымалы қызмет көрсету кабинасын жұлып кеткен. Құрылғы шамамен 20 метр жерге құлап, қатты бүлінген.
Ресей ғарышкерлік федерациясының мүшесі Александр Хохловтың айтуынша, бұзылған тұғырды қалпына келтіру оңай емес:
"Жаңасын жасауға өте көп уақыт кетеді. Бұрын мұндай тұғырлар мен қызмет көрсету кабиналары Украинадағы Краматорск қаласында жасалған. Енді Ресейге барлығын нөлден бастап құрастыруға тура келеді", – дейді маман.
Маман бұдан бөлек, балама нұсқа да бар екенін атап өтті. Ол – Қазақстанға музейлік жәдігер ретінде берілген Гагарин тұғырының кабинасын уақытша пайдалану.
"Кабина жақсы сақталған. Ресей Қазақстанмен келіссе, оны орнатуға аса көп уақыт та, қаржы да қажет етпейді. Бірақ бұл тәсілдің өзі 2026 жылдың жазына дейін созылуы мүмкін", – дейді Хохлов.
Сарапшы Георгий Тишкиннің пікірінше, зақым көлемі әлі толық белгілі емес, сондықтан жөндеу мерзімі одан да ұзаққа созылуы ықтимал:
"Қандай бөлшектері бүлінгені анықталмады. Жөндеу жұмыстары бір жарым, тіпті екі жылға дейін созылуы мүмкін", – деді ол.
Айлақтың істен шығуы Халықаралық ғарыш станциясының (ХҒС) жоспарлы жұмыстарын күрделендіріп жіберді. Енді ғарышкерлерді алмастыру мен жүк жеткізу АҚШ-пен келісімді талап етеді. Қызмет ақылы болмақ.
Сонымен бірге, әдетте станция орбитасын "Прогресс" кемесі түзетіп отырады. Егер бұл мүмкіндік шектелсе, орбитаны америкалық Crew Dragon арқылы реттеуге тура келеді.
Ал келесі экипаж уақытында ұша алмаса, екі күн бұрын "Союз МС-28" кемесімен ХҒС-қа барған үш ғарышкер станцияда жоспарланғаннан ұзақ уақыт қалуға мәжбүр болуы мүмкін.
