Еуропаның басты мақсаты – АҚШ Украина президенті Владимир Зеленскийді Украинаның Қарулы күштерін Донбастан шығуға мәжбүрлейтін жағдайға жол бермеу. Бұл туралы Bloomberg агенттігі жазады.
"Еуропа құрлығының басты міндеті – АҚШ Зеленскийді Донбастан әскерін әкетуге және Вашингтон тарапынан елеулі қауіпсіздік кепілдіктерінсіз қандай да бір келісімге келуге итермелейтін сценарийді болдырмау. Еуропалық шенеуніктер мұны әділ бейбіт келісім деп есептемейді", – делінген материалда.
Агенттік авторларының айтуынша, алдағы уақытта бірқатар еуропалық делегациялар АҚШ-қа аттанып, ықтимал реттеу шарттарын талқыламақ.
Еуропа, әсіресе Ұлыбритания, АҚШ президенті Дональд Трамп қазан айындағы ұстанымына қайта оралып, Ресей экономикасына қысымды күшейтеді деп үміттенеді. Алайда ЕО елдері Трамп келісім жүзеге аспай қалса, бұл мәселеден біржола бас тартуы мүмкін деп алаңдайды.
