Қырғызстанда Бішкек қаласы бойынша ҰҚК басқармасының бұрынғы басшысы Эльдар Жакыпбековке жақын саналған азамат ұсталды, деп Arasha.kz тілшісі 24.kg басылымына сілтеме жасап хабарлайды.
Қырғызстандық БАҚ-тың дерегінше, ІІМ-нің Қылмыстық іздестіру бас басқармасының қызметкерлері Шу облысы бойынша ҰҚК тергеушісін ұстаған. Ол "Вазелин" лақап атымен танымал, шын есімі – Ұлан. Айтуларынша, ол Эльдар Жакыпбековке жақын адамдардың бірі болған.
Ұсталған азаматқа нақты қандай айып тағылып отырғаны әзірге жарияланған жоқ.
Бұған дейін не болды?
Еске салайық, 15 ақпанда Бішкек қаласы бойынша ҰҚК бас басқармасының бұрынғы жетекшісі Эльдар Жакыпбековтің ұсталып, уақытша ұстау изоляторына қамалғаны белгілі болды. Оның ісін Әскери прокуратура тергеп жатыр.
10 ақпанда Камчыбек Ташиев Қырғызстан Министрлер кабинетінің төраға орынбасары – Ұлттық қауіпсіздік мемлекеттік комитетінің (ҰҚК) төрағасы қызметінен босатылды. Тиісті жарлыққа ел президенті Садыр Жапаров қол қойған.
Президенттің баспасөз хатшысының мәлімдеуінше, Ташиевтің жақын ортасындағы адамдар депутаттарға хабарласып, "генерал жағына өтуді" және "жаңа президент сайлауын бастамашы етуді" үгіттеген болуы мүмкін деген ақпарат тараған.
Ташиевтің қызметтен кетуінен кейін күштік құрылымдарда бірқатар өзгерістер болды: оның орынбасарлары да лауазымдарынан босатылды, Шекара қызметі ҰҚК құрамынан шығарылды, сондай-ақ президентке тікелей бағынатын жаңа Мемлекеттік күзет қызметі құрылды. Сонымен қатар жергілікті парламент спикері Нурланбек Тургунбек уулу өкілеттігін тоқтатты. Ал көлік прокуратурасының басшысы Нургазы Матисаков (Ташиевтің жиені) да қызметінен босатылды.
