Қазақстан су ресурстарын есепке алудың жаңа ережелеріне көшуді бастады. Өнеркәсіп министрлігінің мәліметінше, елде деректерді автоматты түрде жіберу мүмкіндігі бар «ақылды» есептегіштер кезең-кезеңімен енгізіледі. Бұл мақалада жаңа талаптардың кімге қатысты екенін және цифрландырудың қандай артықшылықтары бар екенін талдаймыз, деп хабарлайды Arasha.kz.

Тұрғын үй-коммуналдық шаруашылығын (ТҮКШ) жаңғырту жөніндегі ұлттық жоба аясында жүзеге асырылып жатқан бұл бастама саланың толық цифрландырылуын көздейді. Жаңадан орнатылатын барлық есептегіштер Smart Turmys бірыңғай цифрлық жүйесіне қосылып, деректерді автоматты түрде жинауға және өңдеуге мүмкіндік береді.

Жаңа есептегіштерге қойылатын талаптар

Енді Қазақстанда су есептегіш құралдары үшін бірыңғай техникалық стандарт қолданылады. Жаңа талаптарға сәйкес құрылғылар келесі функцияларды атқаруы тиіс:

Деректерді адамның қатысуынсыз автоматты түрде жіберу;

Ақпараттық-өлшеу жүйелеріне және энергия тұтынуды есепке алу жүйелеріне қосылу;

Деректердің криптографиялық қорғанысы болуы;

ТҮКШ цифрлық платформасымен екіжақты байланысты қамтамасыз ету.

Деректерді жіберу үшін ұялы байланыс операторларының желілері арқылы жұмыс істейтін, ақпараттың қорғалуын және тұрақты байланысты қамтамасыз ететін NB-IoT және LoRaWAN технологиялары пайдаланылады.

Сонымен қатар, су кіреберісіндегі жаңа құрылғылар автоматты бекіту клапандарымен жабдықталады. Бұл сумен қамту ұйымдарына заң аясында және уәкілетті қызметкерлер арқылы су беруді қашықтан реттеуге мүмкіндік береді.

Ескі есептегіштерді ауыстыру міндетті ме?

Тұтынушылар үшін ең маңызды жаңалық: қолданыстағы есептегіштерді дереу ауыстырудың қажеті жоқ,. Егер сіздің үйіңіздегі құрылғы дұрыс жұмыс істеп тұрса, оны пайдалану мерзімі аяқталғанша қолдана беруге болады. Жаңа талаптар тек мына жағдайларда ғана күшіне енеді:

Есептегішті алғаш рет орнату кезінде;

Істен шыққан құрылғыны ауыстыру кезінде.

Тұтынушылар мен сала үшін қандай пайда бар?

«Ақылды» жүйеге көшу бірнеше мәселені шешуге бағытталған. Біріншіден, тұтынушылар көрсеткіштерді қолмен жіберуден құтылады. Екіншіден, төлем есептеулеріндегі қателіктер азайып, есеп айырысудың ашықтығы артады. Сумен қамту ұйымдары болса, жүйедегі деректерге қосымша төлемсіз қол жеткізе алады және құрылғының бүкіл пайдалану мерзімі ішінде есепке алуды өз бетінше басқара алады.

Бұл реформа ТҮКШ саласындағы қызмет көрсету жылдамдығын арттырып, суды үнемді пайдалану мәдениетін қалыптастыруға септігін тигізеді деп күтілуде.