Астанада Ресей, Беларусь, Қазақстан және Қырғызстан президенттері Арменияның Еуропалық одақпен жақындасуына байланысты бірлескен мәлімдеме қабылдады, деп хабарлайды Arasha.kz.
Құжатта Арменияның ЕО-ға интеграциялану бағытындағы қадамдары, соның ішінде 2025 жылы қабылданған «Армения Республикасының Еуропалық одаққа кіру процесін бастау туралы» заң және 2026 жылғы 5 мамырда өткен Армения–ЕО саммитінің қорытындылары ескерілген.
Мәлімдемеде Арменияның ЕО-ға мүшелікке дайындалуы Еуразиялық экономикалық одаққа (ЕАЭО) мүше мемлекеттердің экономикалық қауіпсіздігіне елеулі тәуекелдер тудыруы мүмкін екені айтылған. Осыған байланысты ЕАЭО елдерінің өкілдеріне 2026 жылдың желтоқсанына дейін Арменияға қатысты одақ туралы шарттың қолданылуын тоқтатудың ықтимал салдары жөнінде баяндама әзірлеу тапсырылды.
Сонымен қатар тараптар Арменияда қысқа мерзім ішінде Еуропалық одаққа кіру немесе ЕАЭО құрамында қалу мәселесі бойынша жалпыхалықтық референдум өткізуді қолдайтындарын мәлімдеді.
Ал Армения премьер-министрі Никол Пашинян елдің ЕАЭО-дан шығуды жоспарламайтынын бірнеше рет атап өткен.
«Біз Еуразиялық экономикалық одақтан шығуды көздеп отырған жоқпыз. Керісінше, еліміздің экономикалық мүдделерін қорғау үшін одақтағы мүмкіндіктерімізді пайдаланамыз», – деді Пашинян.
Бұған дейін Армения парламенті елдің Еуропалық одаққа кіру процесін бастау туралы заң жобасын бірінші оқылымда мақұлдаған болатын.
