Кувейттегі АҚШ Әуе күштері пайдаланатын «Али Әл-Салем» әуе базасына жасалған зымыран соққысынан кейін бірнеше америкалық әскери қызметкер жарақат алды, деп хабарлайды Arasha.kz сайты Bloomberg агенттігіне сілтеме жасап.
Агенттік мәліметінше, 30 мамырда ирандық баллистикалық зымыранды Кувейттің әуе шабуылына қарсы қорғаныс жүйесі атып түсірген. Алайда, оның сынықтары база аумағына құлаған. Салдарынан әрқайсысының құны шамамен 30 миллион долларды құрайтын АҚШ-тың екі MQ-9 Reaper соққы беруші дроны зақымданды. Оған қоса, бірнеше америкалық әскери қызметкер мен азаматтық мердігерлер жеңіл жарақат алды.
Шабуыл АҚШ пен Иран бітімгершілікті ұзарту туралы жаңа келісімді талқылап жатқан тұста орын алды. Құжат атысты тоқтату режимін 60 күнге ұзартуды, Ормуз бұғазы арқылы еркін кеме қатынасын қайта жандандыруды және Иранның ядролық бағдарламасы бойынша жаңа келіссөздерді бастауды қарастырады.
Сонымен қатар, АҚШ президенті Дональд Трамп Вашингтонның келіссөздерді жалғастырып жатқанын, алайда олар сәтсіз аяқталған жағдайда әскери күш қолдануды жоққа шығармайтынын мәлімдеді.
Америка басшысының айтуынша, қазір оқиғаның дамуының екі нұсқасы қарастырылуда:
«Біз не керемет келісімге қол қоямыз, не мәселе әскери жолмен шешіледі. Бірақ мен келісімді қалар едім», - деді Трамп Fox News арнасына берген сұхбатында.
Сонымен қатар, ол келіссөз процесінің американдық тарап күткеннен баяуырақ жүріп жатқанын мойындады.
