Таиланд полициясы Бангкоктағы Суварнабхуми халықаралық әуежайында елден кетпек болған туристің ұсталғанын хабарлады. Алдын ала нұсқа бойынша, ол қызды өлтіріп, денесін чемоданға жасырып қойған болуы мүмкін, деп хабарлайды Arasha.kz kznews.kz сайтына сілтеп.
Metro басылымының мәліметінше, 46 жастағы Австралия азаматы Саймон Керман Паттайяда 17 жастағы жергілікті қызбен танысқан. Кейін қыз із-түзсіз жоғалып кеткен.
Тергеуде жергілікті БАҚ жариялаған бейнебақылау камераларының жазбалары маңызды рөл атқарған. Кадрларда ер адамның таңға жақын 17 жастағы қыздың қолынан ұстап, қонақүйге бірге кіргені көрінеді. Ал кешке қарай ол ғимараттан үлкен қара чемоданмен шыққан.
Чемоданды мотоциклге дейін жеткізу оған шамамен 20 минут уақыт алған. Ер адам оны әрең сүйреп апарып, кейін мотоциклге ұзақ уақыт бойы тиеп, бекітуге тырысқан. Арада 20 минут өткен соң ол қонақүйге қолында ештеңесіз қайта оралған.
17 жастағы қыздың достары онымен ұзақ уақыт байланыса алмаған соң полицияға жүгінген. Кейін қыздың денесі салынған чемодан теміржол маңынан табылды.
Қаза тапқан қыздың ата-анасына үндеуінде Керман: "Қызыңызбен мұндай жағдай болғанына қатты өкінемін, мен ештеңе істей алмадым", – деген.
Австралия азаматы өз кінәсін мойындамай отыр. Оның айтуынша, жаңа танысы ол ұйықтап жатқан кезде бөлмеден шығып кеткен.
Алдын ала мәлімет бойынша, екеуі ақшаға байланысты жанжалдасқан болуы мүмкін. Күдіктінің қонақүй бөлмесінен күрес іздері табылған. Ал Керманның беті мен мойнында көптеген тырнақ іздері болған. Бұл жәбірленушінің қарсылық көрсеткенін білдіруі мүмкін. Алайда австралиялық ер адам бұл жарақаттарды "өрмекшілердің шабуылымен" түсіндірген.
