Қазақстанда шомылу маусымы басталғалы бері ел аумағында 69 бала суға батып қайтыс болды. Бұл туралы Ішкі істер министрлігі мәлімдеді, деп хабарлайды Arasha.kz, Bairaq Media-ға сілтеме жасап.
Ведомствоның мәліметінше, қайғылы оқиғалардың басым бөлігі шомылуға тыйым салынған әрі арнайы жабдықталмаған су айдындарында тіркелген.
Осыған байланысты ІІМ ата-аналарды балаларды су жағасында қараусыз қалдырмауға және қауіпсіздік ережелерін қатаң сақтауға шақырды. Сондай-ақ азаматтарға тек арнайы жабдықталған жағажайларда ғана шомылу қажеттігі ескертілді.
Бұдан бөлек, жыл басынан бері тыйым салынған жерлерде суға шомылғаны үшін 2700-ден астам адам әкімшілік жауапкершілікке тартылған.
Құтқарушылар жазғы демалыс кезінде қарапайым қауіпсіздік талаптарын сақтау адам өмірін сақтап қалудың басты кепілі екенін еске салды.
