Жойқын жер сілкінісінен кейін іздестіру-құтқару жұмыстары әлі де жалғасып жатыр. Билік із-түзсіз жоғалғандардың нақты санын жарияламағанымен, жергілікті БАҚ ондаған адамның тағдыры әлі белгісіз екенін хабарлауда, деп хабарлайды Arasha.kz, ru.euronews.com-ға сілтеме қалдырып.
Құтқарушылар аман қалғандарды табуға бар күшін салып жатыр. Алайда уақыт өткен сайын тірі қалғандарды табу мүмкіндігі азайып келеді. Ең қатты зардап шеккен аймақтардың бірінде сейсенбі күні бірнеше жер сілкінісі тіркеліп, ең күштісінің магнитудасы 7,1 балл болған.
Іздестіру-құтқару жұмыстарына әскери қызметкерлер де жұмылдырылған.
Апаттан аман қалған тұрғындардың айтуынша, олар үйлеріне оралып, үйінді астында қалған жақындарын өз қолдарымен құтқаруға тырысқан. Зардап шеккендердің бірқатары түрлі жарақат алып, ауруханаға жеткізілген.
Мыңдаған адам екінші түн қатарынан спорт залдары мен басқа да ірі ғимараттарда ұйымдастырылған эвакуациялық орталықтарда түнеуге мәжбүр болды. Көптеген үй әлі күнге дейін жарықсыз және ауызсусыз отыр.
Бұл елде жер сілкінісі жиі болатындықтан, құрылыс талаптары қатаң сақталады. Соған қарамастан, апат болған өңірдегі кейбір ескі үлгідегі үйлер жерасты дүмпулеріне төтеп бере алмай, қатты зақымданған.
Ең көп зардап шеккен нысандардың бірі - Aeon сауда орталығы. Жер сілкінісі болған сәтте ғимарат ішінде мыңдаған адам болған.
Компания мәліметінше, шамамен 3 мың адамды автотұраққа қауіпсіз шығарып үлгерген. Алайда көп ұзамай кешеннің бір бөлігінде жарылыс болып, сауда орталығының екінші қабаты опырылып түскен. Соның салдарынан бірнеше адам үйінді астында қалған.
Билік мәліметінше, бейсенбі таңына дейін сауда орталығы аумағынан алты адамның мәйіті табылған. Сонымен қатар құтқарушылар үйінді астынан 11 адамды аман алып шыққан.
Бейсенбі күні аптап ыстыққа қарамастан, хабар-ошарсыз кеткендердің туыстары сауда орталығына жиналып, жақындары туралы қандай да бір ақпарат алуға үміттенген.
Тағы бір өндірістік нысанда мұржаның құлауы салдарынан 10 адам құтқарылды. Сегіз адамның қаза тапқаны расталды, тағы бір адам із-түзсіз жоғалғандар қатарында.
Қазіргі таңда шамамен 23 мың тұрғын үй әлі де электр қуатынсыз қалып отыр. Ал 10 мыңнан астам адам билік ұйымдастырған 400 уақытша паналау орнына орналастырылған. Аптап ыстыққа байланысты бұл орталықтарға кондиционерлердің үздіксіз жұмыс істеуі үшін қосымша электр көздері жеткізіліп жатыр.
Айта кетейік, бұл қайғылы оқиға Жапонияның Кюсю аралындағы Кумамото префектурасында болды.
