Ресей президенті Владимир Путин Бішкекте өтіп жатқан Шанхай ынтымақтастық ұйымы саммиті аясында Қытай Халық Республикасының төрағасы Си Цзиньпинмен келіссөз өткізді. Бұл туралы Кремльдің баспасөз қызметі хабарлады, деп жазады Arasha.kz.
Кремль мәліметінше, Си Цзиньпинмен кездесу Путиннің саммит аясындағы шетелдік көшбасшылармен екіжақты келіссөздерінің алғашқысы болды. Жалпы Ресей президентінің тоғыз кездесу өткізуі жоспарланған.
Кездесу барысында екі ел басшылары Ресей мен Қытай арасындағы екіжақты қарым-қатынастарды талқылады.
Атап айтқанда, Владимир Путин Қытаймен визасыз режимді тұрақты негізге көшіруге дайын екенін мәлімдеді.
Ресей президентінің айтуынша, визасыз режим енгізілгеннен кейін екі ел арасындағы туристер ағыны айтарлықтай артқан. Биылғы жылдың алғашқы жартысында туристер саны 43 пайызға көбейген.
"Егер Қытай тарапы мұны орынды әрі пайдалы деп санаса, визасыз режимді тұрақты негізге көшіру жөнінде бірлесіп жұмыс істеуге дайынбыз", – деді Владимир Путин.
