Қазақстанда «Жыл еріктісі» халықаралық сыйлығына қатысуға өтінім қабылдау басталды. Байқауды Мемлекет басшысы Қасым-Жомарт Тоқаевтың волонтерлік қозғалысты дамыту және қолдау жөніндегі тапсырмасын іске асыру аясында Мәдениет және ақпарат министрлігі ұйымдастырып отыр, деп Arasha.kz тілшісі Kazinform.kz-ке сілтеме жасап хабарлайды.
Жыл сайын табысталатын халықаралық сыйлық әлеуметтік және қоғамдық маңызы бар мәселелерді шешуге үлес қосқан волонтерлерді, волонтерлік топтарды, сондай-ақ отандық және халықаралық ұйымдарды ынталандыруға бағытталған.
Биыл сыйлық 15 аталым бойынша беріледі. Олардың қатарында:
«Үздік волонтерлік ұйым»;
«Корпоративтік волонтерліктің көшбасшысы»;
«Тұрақты даму мақсаттарының көшбасшылары»;
«Үздік әлеуметтік көмекші»;
«Төтенше жағдайларды жоюға белсенді қатысқаны үшін»;
«Хабар-ошарсыз кеткен адамдарды іздеуге белсенді қатысқаны үшін»;
«Құқық бұзушылық құрбандарына көмек көрсетуге белсенді қатысқаны үшін»;
«Денсаулық сақтау саласын дамытуға белсенді қатысқаны үшін»;
«Салауатты өмір салтын насихаттауға қосқан үлесі үшін»;
«Білімді дәріптеуге қосқан үлесі үшін»;
«Қоршаған ортаны сақтауға және қорғауға қосқан үлесі үшін»;
«Бейбітшілік, достық және келісімді нығайтуға қосқан үлесі үшін»;
«Тарихи-мәдени мұраны сақтауға және дамытуға қосқан үлесі үшін»;
«Жануарларды қорғау мәселелерін шешуге қосқан үлесі үшін»;
«Әлеуметтік мәселелерді шешуге қосқан үлесі үшін».
Байқауға қатысушылар бір ғана аталым бойынша өтінім бере алады.
Құжаттарды қабылдау 2026 жылғы 7-27 қыркүйек аралығында жүргізіледі. Өтінімдер Qazvolunteer.kz сайты арқылы қабылданады. Сыйлықты тағайындау тәртібі туралы толық ақпаратты осы порталдан немесе www.adilet.kz жүйесінен білуге болады.
Байқауға қатысты сұрақтар бойынша +7 (717-27) 4-12-86 және 74-03-11 телефон нөмірлеріне хабарласуға болады.
Айта кетейік, бұған дейін Астанада «Оқитын ұлт» атты алғашқы республикалық кітап оқу марафонына тіркелу басталған болатын. Байқау жеңімпаздары 600 мың теңгеге дейін сыйақы ала алады.
