Атырау облысында өлі күйінде табылған Бауыржан Асаиновтың қазасына қатысты тың ақпарат пайда болды, деп хабарлайды Arasha.kz.
Марқұм облыстық Әлеуметтік қорғау саласындағы реттеу және бақылау комитетінің департаментін басқарған.
Бауыржан Асаиновтың денесі 18 қазанда өзі тұрған пәтерден табылған.
Алдын ала тараған мәліметтерге сүйенсек, марқұмның денесі пәтерде шамамен екі апта бойы жатқан болуы мүмкін. Осы уақыт ішінде тұрғын үйге жылу берілгендіктен, мәйіттегі өлімнен кейінгі өзгерістер жылдамдаған болуы ықтимал. Бұл жағдай өлімнің нақты себебін анықтауды қиындатуы мүмкін.
Сондай-ақ шенеуніктің қазасына қатысты тағы бір болжам айтылып отыр. Бейресми ақпарат бойынша, Бауыржан Асаинов пен оның ағасы арасында жанжал туындауы мүмкін. Екеуі бірге ішімдік ішкеннен кейін сөзге келіп, ағасы оған қол көтерген деген мәлімет тараған. Болжам бойынша, ағасы пәтерден кеткен кезде Асаинов әлі тірі болған.
Алайда бұл ақпарат әзірге ресми түрде расталған жоқ. Марқұмның нақты неден көз жұмғаны және оқиғаға өзге адамның қатысы бар-жоғы құзырлы органдардың қорытындысынан кейін белгілі болуы мүмкін.
