Нұр-Сұлтан полиция департаменті қалаға қалың қар жаууына байланысты көліктердегі жазғы доңғалақты тезірек ауыстыруды сұрады.

«Бір тәуліктің ішінде астанада 96 жол апаты тіркелді. Осыған байланысты жолда барынша абай болу керек. Рұқсат етілген жылдамдықты сақтап, тежегішті кенттен баспаған жөн. Сосын алдыңғы және қапталдағы арақашықтықты сақтау қажет», – дейді полицейлер.

Сондай-ақ полиция жаяу жүргіншілерге де абай болуға кеңес берді. Жолдан өткенде құлаққапты шешіп, телефонмен сөйлеспеген жөн екенін ескертеді. 

Қалың қар түсіп, көктайғақ болуына байланысты көшеде көлік кептелісі көбейді.

Қазгидрометтің болжамына сәйкес, сейсенбі, 5 қазанда елордада ауа температурасы 0-плюс 2 болады. Қар аралас жаңбыр жауады.