Жаңаөзен қаласындағы «Мұнайшы» мәдениет үйінде Бекет Ата Мырзағұлұлының 275 жылдығына арналған «Бабамның төрі – Байтағым!» атты республикалық ақындар айтысы өтті. Жыр додасына еліміздің түкпір-түкпірінен келген ақындар қатысып, өз өнерлерін ортаға салды.

Айтыстың жүргізушісі – өнер мен айтыстың белді тұлғасы, ақын, ҚР еңбек сіңірген қайраткері, «Құрмет» орденінің иегері Аманжол Әлтай болды. Ол айтыстың мазмұнын ашып, ақындарға дем беріп, кештің көркін қыздырды.

Бұл аламанның әділ бағасын беруге қазақ айтысының абыз тұлғалары шақырылды. Қазылар алқасының төрағасы – Қазақстанның еңбек сіңірген қайраткері, Қазақстан айтыс ақындары мен жыршы-термешілерінің халықаралық одағының төрағасы, «Құрмет», «Парасат», «Отан» ордендерінің иегері – Жүрсін Ерман. Айтыс өнерінің дамуына өлшеусіз үлес қосқан Жүрсін Ерман бұл сайыстың да жоғары деңгейде өтуіне ерекше ықпал етті.

Қазылар құрамында:

• Нұртөре Жүсіп – жазушы, журналист, ҚР еңбек сіңірген қайраткері, «Құрмет» орденінің иегері;
• Жанарбек Әшімжан – ақын, ҚР Парламент Мәжілісінің депутаты, ҚР еңбек сіңірген қайраткері;
• Қалқаман Сарин – ақын, «Алтын қалам» әдеби сыйлығының жүлдегері;
• Мелс Қосымбаев – белгілі ақын, жазушы, мәдениет қайраткері, айтыс өнерінің шебері.

Олар ақындардың суырыпсалмалық қабілетін, тапқырлығын, айтыстың көркемдік деңгейін, ұлттық болмысын бағалап, әділ шешім шығарды.

Бірінші айналымда барлық қатысушылар жұптасып, өз өнерлерін ортаға салды. Бекет Атаның өмірі мен мұрасын жырға қосқан ақындар ұтымды ұйқас, өткір сөз, терең мағына арқылы көрерменнің ықыласына бөленді.

Айтыстың екінші кезеңінде ақындар бір-бірімен бәсекеге түсіп, шын мықтыны анықтады. Әр жұптың айтысы өз алдына бір көркем жыр, мән-мағынасы терең сөз сайысы болды. Финалда ақындар нағыз сөз барымтасын жасап, ой мен сезімді, ел мен жерді жырға қосып, көрерменді ерекше әсерге бөледі.

Айтыс нәтижесі бойынша үшінші орынды ақтөбелік Ахметов Марат пен жаңаөзендік Арғынбек Қалбаев иеленіп, әрқайсысы 1 миллион теңге сертификатқа ие болды. Қарағандылық Дидар Қами екінші орынды жеңіп алып, 2 миллион теңге жүлдені қанжығасына байлады. Қызылордалық Мейірбек Сұлтанхан үздік шығып, бірінші орын мен 3 миллион теңге жүлдені иеленді. Ал айтыстың бас жүлдесін жаңаөзендік Абай Жолмағамбетов жеңіп алып, автокөлікке ие болды.

Айтыс соңында қазылар алқасы жеңімпаздарды құттықтап, марапаттады.